ياعزيزي كلنا حمير

يا عزيزي كلنا حمير
- إنت أهلاوي والا زملكاوي
- أهلاوي
- وإيه رأيك في ماتش الأهلي الأخير
- الأهلي ما كنش قد كده بس كسب الماتش
- تصدق أنا طول عمري بقول الأهلاوية دول حمير ومش بيفهموا في الكورة
********
- شفت إيران واللي بتعمله في أمريكا
- آه دي مورياها الويل
- آه ونجاد أنا معجب بيه جدا
- وأنا كمان تحس إن الجرال ده رد لنا كرامتنا
- على فكرة إنت باين عليك بتفهم في السياسة كويس
********
- يا ختي إنت مش بتعملي جنب المكرونة سلطة ليه
- عادي مش فارقة معايا
- عادي ازاي ياحبيبتي هي المكرونة تتاكل من غير سلطة
- يا ستي احنا بناكلها من غير سلطة
- انت باين عليكي مش بتعرفي تعملي سلطة وشكلك كده حماره كبيرة في المطبخ
********
- سمعت شريط عمرو دياب الجديد
- آه سمعته
- وإيه رأيك ؟
- يعني فيه أغاني كويسة وأغاني مش حلوة
- أنت باين عليك حمار ومش بتفهم هو عمرو يطلع شريط وحش
********
دي مجرد نمازج صغيرة للحوارات اللي تدور بينا سواء في الشغل أو في الشارع أو الجامعة أو بين ستات البيوت كل الحوارات اللي بينا تبكون بالشكل ده متفقين في الرأي يبقا أنت رجل كويس وبتفهم وربما عبقري أيضا ونتبادل حوارات الثناء والمديح رغم إننا في أغلب الأحيان مش بنكون عارفين في الموضوع غير طراطيش كلام وبنكمل من عندنا
ولو اختلافنا بتكون مصيبة بتكون حمار وغبي ومش فاهم حاجة في حياتك ونفضل كده نتبادل الشتائم والاتهامات وبيكون كل واحد في نظر التاني حمار كبير
طيب كده بقا كلنا حمير
طبعا كلنا حمير بس حمير عشان مش عارفين نتناقش كل واحد بيستبد برأيه وعايز يفرضه على التاني أو عايز يأيده في رأيه ولما ميحصلش بيكون حمار
إحنا حمير عشان مناقشتنا عبارة عن نهيق حمير صوت عالي وصداع ومش بتوصل لأي نتيجة في الآخر محدش بيقتنع برأي ولا بيكون عنده تصور إن في حد ممكن يخالفه كأنه علامة العلماء وحكيم الحكماء
إحنا حمير عشان مش قادرين نفهم إن في اختلاف بين الناس وبعض اختلاف في الأذواق والتعليم والتربية والثقافة اختلاف في نظرتنا للأشياء تخيل لو كل الناس شبه بعض في كل حاجة تخيل مقدار التخلف وعدم التنوع في الأفكار والجمود والملل في الحياة
إحنا حمير عشان مش بنراعي أذواق بعض واختلافات بعض كلنا لازم نأكل برسيم وتبن
إحنا حمير جدا العالم كله من حولنا يتناقش ويوصل لحلول لمشاكله ويوصل لاستغلال لامكانياته وإحنا هنا كل شغلتنا ننهق في المواضيع ونحط فيها روث أفكارنا وإحنا واقفين في أماكننا والعجيبة ننام واحنا مقتنعين بأفكارنا ومنفكرش إن كنا راضيين عن نفسنا تمام زي الحمير
- إيه مالك مش فاهمني
- لا مش فاهمك
- متشغلش بالك أنا بنهق بس ما أنت عارف مصر والعالم العربي بقا كله حمير ممكن تقول عليه زريبة كبيرة فيها حوالي 22 فصيلة حمير كل حمار في كل فصيلة بينهق بشكل مختلف أنا بقول إن إحنا كلنا حمير عندك مانع
- أنا مش حمار
- ده أكبر دليل على إنك حمار ومش فاهم حاجة

أسامه عماره
31/7/2007

رفعت في 19/11/2010