بحبك يا بلدى

بحبــك يا بلدي يا أم الزراعة يا ام الحضارة يا أم الصناعة

بحبــك يا بلدي بصدق وحرارة لأنك بنيتي أصول الحضارة

زرعتي الصحاري ونيلك مجاري علي أرض توشكي بتبكي الزراعه

بحبك يا بلدي يا أم الصناعـــه غلبتـي اليابانــي بفــن ومهـــاره

وصيني وماليزي وهندي وباريسي وخيرك ملانا بربح التجارة

فلوسنا كتيرة وحشنا الحصيره دا ريش النعام يجـيب الــمرارة

وأطفال شوارع بتبني البيوت ومات التسـول... بحسن الإدارة.!

كفايا بأنـك نهـيــتي البطالــه وكــــل الشوارع مـا تعرف زبـالــه

وكل اللي قلته أكيد مش نفاق ومين اللي يصدق يا ألفين خساره..!

وقــولــوا معايا يعيش النظـــام وتبقـي بلادنــا بفضلـــه منــاره..!

من ديوان /أحلام شاعر

محمدأحمد الغندور محمد
الزقازيق
ابن النيل